شئ من الخوف

الواحد كل ما تحصل مصيبة أو خلينا نقول حدث غير سارفي البلد، غصبًا عنه بيجري ويشطح بخياله لقدام قوي، لغاية ما يوصل لتخيل مستوحى من أفلام الأبوكاليبس والزومبيز الأمريكية، عن حالنا في المستقبل إللي مش شرط يكون بعيد! وبالأخص كل ما افتكر مشكلة سد النهضة، ييجي في بالي علطول فيلم ماد ماكس (Mad Max) وافتكر قد إيه بسبب فقر المياه بقوا مذلولين لفئة من المتوحشين والمسوخ! وأقول يا رب ما تكتب لنا المصير ده! تخيلوا بلدنا اللي أكثرها ناس فقراء وتحت خط الصفر وشوارعنا اللي مليانة مشردين وبلطجية وأطفال شوارع، وقد إيه هي بيئة خصبة ومهيئة لمثل هذه النتائج المفجعة، يوم ما لا قدر الله "ويا رب ما يكتبها علينا" نتعرض لأي أزمة إيه اللي هيحصل.. أول حاجة طبعا هنتشحتف ونشحت من كل بلد شوية مياه، وبعدين المياه المعدنية ساعتها يضرب سعرها في السما واللي غني قوي يطفش على أي بلد برا، واللي هيقعد هنا ومعاه فلوس (كتير بجد) يجري يكنز مياه ولو بني آدم سيئ يبقى مفيش مشكلة يتاجر بيها في السوق السودة!

ثم يأتي دور البشر اللي طول عمرهم في عداد الأموات يستقووا على أيًا كان اللي قدامهم، ما هو اشمعنى دلوقت يتعاملوا كبشر برحمة وهم اللي طول عمرهم مهمشين ومهملين ولا كأنهم حشرات!! ساعتها كلمة إرهاب دي هتبقى رفيعة، لما اللي انهاردة بيتبصلهم على انهم كائنات مالهاش لازمة ونتجاهلهم وكمان نستخسر فيهم أقل الصدقة بحجة انهم عالة على المجتمع، يجيلهم يوم هم كمان يقووا قلبهم ومايراعوش آدمية غيرهم وهيبقى عندهم ألف حق لأن ماشفوش غير الهوان والقهر من غيرهم.

الكلام ده (للي هيقرا أصلا) مالوش أي غرض سياسي، ومش معناه بالضرورة ان السيناريو ده خاص بمشكلة المياه وبس. اللي عاوزة أقوله، هو ان احنا كشعوب، والله العظيم ما حد داري بينا! ولو ما بصيناش حوالينا وحاولنا نعمل أي حاجة ولو بسيطة لمن هم حولنا من المعذبين، كواجب نحو أنفسنا وليس تفضلًا منا عليهم، احنا ماعندناش أي فرصة للنجاة! انت مش هتساعد غيرك عشان لما تحصل الكارثة مايدبحكش بدم بارد عشان يعيش هو، لأ انت هتساعده عشان ماتوصلش للمرحلة دي من الأساس. وشكرًا.

#شئ_من_الخوف

# ربنا_يسترها_معانا

#بحلم_وانا_صاحي